Ysgol Llwynderw - un huñvre deuet da wir

Ul lid a oa bet dalc'het digwener da-geñver digor ar skol kentañ-derez da vezañ savet a-ratozh-kaer en Abertawe (Swansea) evel skol gembraek. Kentañ-ministr Kembre, Rhodri Morgan, a gemeras perzh el lid en Ysgol Gynradd Llwynderw ha gant ar skolidi e voe kanet ur ganaouenn bet savet evit ar skol.

Digoret e oa bet Ysgol Gynradd Llwynderw e 2002, met war un dachenn all, e karter Sgeti (Sketty). Gortozet eo ez aio war greskiñ niver ar skolidi, ha plas a vo evit 350.

An emsav Rhieni Dros Addysg Gymraeg zo bet o stourm ma vefe digoret muioc'h a skolioù kembraek en Abertawe ha tro-war-dro. Eus o ferzh en deus lavaret Heini Gruffudd ez eo 'dispar, goude stourm e-pad ugent vloaz, gwelet ur skol gembraek gant ar re wellañ er vro a-bezh, diazezet en ur c'horn ma ne oamp ket evit krediñ e vefe... Diazezañ ar skol-mañ zo un doare huñvre.'

http://news.bbc.co.uk/welsh/hi/newsid_8080000/newsid_8086000/8086018.stm